Regsfilosofiese implikasies van meta-etiese historisme. Kritiese opmerkings oor politokratiese kommunitarisme

Die opkoms van kommunitêre regs- en staatsteorieë geskied teen die agtergrond van filosofiese onbehae jeens die individualistiese en subjek-gesentreerde regsbewussyn van die modernistiese regs- en politieke denke. Veral anti-modernistiese regsdenke neig tot sterk kommunitêre standpunte oor regsnorme, fundamentele regte en die beklemtoning van meta-etiese gemeenskapsideale as teenvoeter vir die menseregtekultuur van die liberale individualisme. Gardbaum identifiseer drie belangrike temas wat sentraal tot die kommunitêre diskoerse staan: eerstens, die personaliteitsdiskoers oor die rol van die individu as regsosiologiese subjek; tweedens, die debat oor meta-etiese waardes en die rol daarvan in die gemeenskap, en derdens, meningsverskil oor die status en rol van gemeenskap as ’n transpersonale entiteit wat grondliggend aan die regs- en politieke lewe is.