Notas sobre la edición del tercer concilio provincial Limense

Peculiarem quamdam rationem tertii Concilii Limensis, inter alias non levis momenti plures, constituit citissima et officialis Actorum ipsius editio. De qua quidem scriptores saepe memoriam fecerant, Patrique Iosepho de Acosta tribuerant ex rationibus congruis, non tamen resolutivis. Haec melius explicantur per accuratum examen ipsius textus manuscripti talis primae editionis, nunc in biblioteca Universitatis Salmanticensis, et numquam sub hoc aspectu considerati. Unde clare apparet et directio ipsius Patris in tali editione, et eius participatio in correctionibus romanis decretorum Limae, simul cum aliis notatu dignis. Aliud manuscriptum de eadem fere re sed sub alia ratione, et etiam ad eumdem Patrem Acosta pertinens ut anterius, asservatur in bibliotheca Academiae Historiae Matriti, quod lucem quamdam novam praebere potest ad quasdam circumstantias magis illustrandas. Nostrae conclusiones roborantur melius ex comparatione manuscripti salmanticensis cum duobus aliis apud S. Congregationem Concilii Romae custoditis, ad discussiones Cardinalium et approbationem pontificiam adhibitis, et Archivio illius S. Congregationis commissis. Addimus epistolam ineditam praesidis Synodi Limensis, Sancti Thuribii de Mogrovejo ad Romanum Pontificem, ubi explicat laborem Concilii, postulat eius approbationem, et commendat P. Acosta pro tali negotiatione. Hoc modo melius intelligitur positio huius theologi consultoris Synodi Limensis in his eventibus.