Y Cywydd

Yr oedd mesur y cywydd yn hanfodol i’r blodeuo a fu mewn barddoniaeth Gymraeg yn y bedwaredd ganrif ar ddeg ac wedi hynny. Gwelwyd yn y bennod flaenorol fod canu da wedi’i gynhyrchu ar gyfrwng yr awdl, ond bod unrhyw ddatblygiadau newydd o ran y cynnwys yn betrus iawn, fel petaent yn digwydd er gwaethaf y ffurf yn hytrach nag o’i herwydd. Roedd angen mesur newydd ar gyfer cyfnod newydd. Ehangodd y farddoniaeth mewn sawl ffordd yn y cyfnod ar ôl y goncwest. O ran nawdd a chynulleidfa, cymerwyd lle’r tywysogion gan ddosbarth is a llawer mwy niferus yr uchelwyr.