Açıq tarix dərslərində arxeoparklara gəzintinin təşkili və arxeoloji materiallardan istifadənin tədrisin keyfiyyətinə təsiri

Ümumtəhsil məktəblərində «Tarix» fənninin tədrisində qarşıda duran əsas məsələlərdən biri şagirdlərə təkcə elmi informasiyaların verilməsi və bunların davamlı olaraq təkrarlanması deyildir. Şagirdlərdə vətənimizin qədim tarixinə həvəs yaratmaq ən qədim sakinlərin yaşayıb-yaratdıqları ərazilərin tarixi coğrafiyasının öyrənilməsi, qədim insan izlərini özündə yaşadan arxeoloji abidələrimizin tanıdılması və tarixi abidələrimizə əsassız düşmən iddialarının çoxaldığı bir zamanda arxeoloji-tarixi və memarlıq abidələrimizə marağın artırılması ilə mümkündür. Məqalədə son illərdə arxeoloji qazıntıların geniş vüsət aldığı respublikamızda aşkar edilən və elmə tamamilə yeni faktlar gətirən onlarla abidələrimizə məktəblilərin gəzintisi və hətta açıq tarix dərslərinin bu arxeoparklarda keçirilməsinin elmi-praktiki və tədris əhəmiyyətindən danışlır. Arxeoloji qazıntılar və bunun əsasında qurulan arxeoparklar hazırda dünya ölkələrinin qədim tarixinin təbliğinin ayrılmaz tərkib hissəsidir. Arxeologiya və arxeoloji qazıntıların nəticələrinin birbaşa iqtisadiyyata tətbiq olunaraq gəlirli sahəyə çevrilməsinə əsaslanan arxeoturizm isə durmadan inkişaf etməkdədir. Arxeoparklar arxeoturizm ilə ciddi məşğul olan ölkələrin maddi mədəniyyətinin, tarixinin, etnoqrafiyasının həm ölkə vətəndaşlarına, həm də ölkəyə gəlmiş əcnəbilərə birbaşa təbliğ etdirilməsinə xidmət edir.