As publicacións científicas da Universidade de Vigo en acceso aberto. Semana do Acceso Aberto, 25 ao 31 de outubro de 2021

Co gallo da Semana do Acceso Aberto 2021, a Biblioteca Universitaria de Vigo presenta un estudo sobre as publicacións en acceso aberto producidas polo persoal investigador da universidade entre 2011 e 2020, indexadas en Web of Science (WOS). Neste estudo analizamos tanto aquelas publicacións en revistas e editoriais que ofrecen acceso gratuíto aos seus contidos coma aquelas depositadas nalgún repositorio público. Ofrecemos datos da evolución do número e da porcentaxe de documentos en acceso aberto, e comparamos estes datos cos da media mundial, europea, española e galega. Observamos cales son os ámbitos temáticos nos que os membros da Universidade de Vigo máis publican en aberto, e se existen diferenzas de citación entre os documentos en acceso aberto con respecto aos demais. Por último, recollemos as revistas que con maior frecuencia utiliza o persoal investigador da Universidade de Vigo para publicar en aberto, e engadimos a evolución da publicación en aberto nas editoriais coas que a universidade ten algún tipo de acordo ou desconto por publicar.