کاریگەریی بیر و ئەندێشەی چەپ بەسەر حیزبی دێموکراتی کوردستانی ئێران له ‌ماوه‌ی نێوان ١٩٧٠ – ١٩٧٩: توێژینەوەیەکی مێژوویی، سیاسییە

یه‌كێك له‌ كاریگه‌رترین ئایدولۆژییه‌كانی سه‌ده‌ی بیسته‌م، كه‌ مۆرك و نیشانی خۆی له‌ زۆر ڕووداوی سەدەی ڕابردوو داوه‌ و به‌ ملیۆنان كه‌سی كردە شوێنكه‌وتووی خۆی، بیری چه‌پ بوو. هه‌ر بۆیه‌ش بوو به‌ یه‌كێك له‌ به‌هێزترین ڕه‌وته‌ سیاسی- كۆمه‌ڵایه‌تییه‌كانی كومه‌ڵگای مڕۆڤایه‌تی. كونفرانسی سێیه‌م (١٩٧١) ئاشتبوونه‌وه‌ی "حدك" بوو له‌گه‌ڵ بیری چه‌پ، كه‌ ماوه‌ی نزیك به‌ ده ‌ساڵ بوو لێی دووركه‌وتبۆوه‌: "حدك" بوو به‌ خاوه‌ن به‌رنامه‌ و پێڕه‌وێكی كۆنكرێت. سیاسه‌تی ئابووری- كۆمه‌ڵایه‌تیی گونجاو له‌ به‌رنامه‌دا گوزاریشتی له‌ چه‌پێكی ڕادیكاڵ ده‌كرد و پێڕه‌وی نێو‌خۆش كۆپیی پێڕه‌وی حیزبه‌ كومونیسته‌كان بوو. پێكهێنانی كومه‌ڵێكی سۆسیالیستی بۆ یه‌كه‌م جار له‌ به‌رنامه‌ی "حدك"دا وه‌ك ئامانجی دواڕۆژ دیاری كرا، باڵی ڕاستی "حدك" به‌ یه‌كجاری چووه‌ په‌راوێزه‌وه‌ و كۆتایی به‌ ململانێی ئه‌و دوو باڵه‌ هات، كه‌ وه‌ك هێڵێكی سووری ململانێ له‌ دامه‌زراندنی (ژ- ك) ه‌وه‌ به‌ مێژووی ئه‌م حیزبه‌دا تێده‌په‌ڕی. له‌وه‌ به‌دوا ململانێی فیكری له‌ نێو "حدك"دا تایبەت بوو به‌ لایه‌نگرانی چه‌پی ڕووسی و چه‌پی دێموكرات. بوونی لایه‌نگرانی سیاسه‌ته‌كانی حیزبی تووده‌، له‌نێو "حدكا" و چالای چه‌ندین گروپی ماڕكسی-لێنینی له‌ كوردستان (١٩٧٩) و گرتنی باڵوێزخانه‌ی ئه‌مریكا به‌هۆی خوێندكارانی ڕادیكاڵ، كه‌ش و هه‌وای سیاسی ڕۆژهه‌ڵاتی كوردستانی ئه‌وه‌نده‌ی تر ڕادیكاڵیزه‌ كرد و ئه‌مه‌ كاریگه‌ری له‌سه‌ر كۆنگره‌ی چواره‌می "حدكا" ١٩٨٠ دانا كه‌ ئه‌م حیزبه‌ له‌ خانه‌ی چه‌پێكی ڕادیكاڵ جێ بگرێ.