Den entreprenørskapsorienterte skuleleiaren

Studien har som føremål å få kunnskap om skuleleiarar som legg til rette for entreprenørskaps- og nettverksorienterte strategiar og aktivitetar ved eigen skule. Det blir brukt ein kvalitativ metode der seks skuleleiarar er intervjua om korleis dei tenker og handlar i høve til arbeidet med tilrettelegging av strategiane. Viktige moment i undersøkinga er å få kunnskap om skuleleiarane si rolle i dette arbeidet, samt deira kompetanse for og holdningar til å vere leiarar av desse prosessane. Funna viser at skuleleiaren som aktiv nettverksbyggar og aktiv brukar av skulen sitt nettverk er avgjerande for tilrettelegginga. Elevane sitt læringsutbytte i form av relevant kompetanse for framtidig yrkesutøving er sentralt i skuleleiarane sin motivasjon for å satse på og legge til rette for entreprenørskaps- og nettverksorienterte strategiar. Funna viser også at tilrettelegging av denne typen strategiar krev ei tilnærming til leiing i form av kollektive og relasjonelle prosessar. Læraren sin autonomi er ein viktig prosessuell føresetnad og delegering av ansvar i form av distribuert leiing vert framheva som viktig. Skuleleiarane vektlegg nøkkelpersonar og eldsjeler i personalgruppa som sentrale og viktige aktørar for å kunne lukkast i arbeidet med å tilrettelegge for entreprenørskaps- og nettverksorienterte prosessar.