KRONIKË SHKENCORE E AKTIVITETEVE TË DEGËS SË GJUHËSISË PËR VITIN 2022

Më 6 qershor 2022, në Prishtinë, nisi punimet edicioni i 13-të i konferencës “Java e Albanologjisë” e organizuar nga Instituti Albanologjik. Në këtë edicion morën pjesë 90 studiues të shkencave albanologjike. Në seancën solemne fjalën e hapjes e mbajti drejtori i Institutit prof. dr. Hysen Matoshi, i cili krahas shpalosjes së programit dhe temave që do të trajtohen theksoi se kjo konferencë mbahet në vigjilje të tre përvjetorëve të rëndësishëm të shkencave albanologjike: 60- vjetori i botimit të numrit të parë të revistës “Gjurmime albanologjike”, 50-vjetori i standardizimit të gjuhës shqipe dhe 40-vjetori i revistës “Gjuha shqipe”. Pas tij, me fjalë përshëndetëse të pranishmëve iu drejtuan: në emër të Akademisë së Studimeve Albanologjike, prof. dr. Valter Memisha (zëvendësrektor), kurse nё emёr tё Institutit të Trashëgimisë Kulturore e Shpirtërore të Shqiptarëve në RMV, prof. dr. Skënder Hasani (drejtor).